(8 Februari 2023)
Pamungkah Bulan Bahasa Bali V Warsa 2023 Kabupaten Klungkung sampun kamargiang rahinane mangkin, Buda 8 Pebruari 2023 ring Balai Budaya Ida Dewa Agung Istri Kanya. Parikrama nyabran warsa puniki kabungkah olih Bupati Klungkung I Nyoman Suwirta, kasarengin Kepala Dinas Kebudayaan Kabupaten Klungkung Ida Bagus Jumpung Gede Oka Wedhana miwah uleman, sapisanan nagingin sambrama wacana indik nyuksmayang Bulan Bahasa Bali, pamekasnyane ngeninin unteng patitis “Segara Kerthi : Campuhan Urip Sarwa Prani”. Tiosan ring ngawerdiang basa, sastra, miwah aksara Bali, Bulan Bahasa Bali V warsa 2023 puniki taler kaaptiang mangda prasida dados jalaran ngraksa buana, pamekasnyane sagara pinaka campuhan urip sarwa prani.
Acara Bulan Bahasa Bali ring Kabupaten Klungkung kalaksanayang kalih rahina, ngawit saking tanggal 8 kantos 9 Pebruari 2023. Wenten makudang-kudang wimbakara sane kamargiang, inggih punika Wimbakara Pidarta Mabasa Bali (Pamilet Kelian Adat/Bendesa), Wimbakara Nyurat Aksara Bali (Pamilet SD), Wimbakara Ngwacen Lontar (Pamilet Yusa 19-25 Warsa), Wimbakara Nyatua Bali (Pamilet Krama Istri), miwah Wimbakara Debat Mabasa Bali (Pamilet SMK/SMA). Acara puniki kamanggalain olih Pemerintah Kabupaten Klungkung sane kaangganin Dinas Kebudayaan, maprakanti sareng Penyuluh Bahasa Bali Kabupaten Klungkung. Salam Gema Santi.
